Waa maxay sababta ay u soo dhacday Dayuuraddii uu la socday Wasiirka Arr.Gudaha ee Meksiko ?!!.

Dayuurad

Dayuurad ay lahayd Meksiko ayaa sabab xagga hoggaamin-xumo ah darteed u soo dhacday, waxaana ku dhintay Masuuliytiin uu ka mid ahaa Wasiirka A.Gudaha ee dalkaas.

War ay soo saartay Xukuumadda dalka Meksiko ayaa sheegaya: in sababta ay u soo dhacday Dayuuraddii uu la socdayWasiirka Arrimaha gudaha ee dalkaas, ay ahayd  cillad xagga farsamada ah.

Shir-Jaraa'id oo uu shalay qabtay Wasiirka Gaadiidka iyo Is-gaarsiinta ee dalkaas, ayuu ku sheegay: in baaritaannadii la sameeyay ay soo bandhigeen: in sababta soo dhicitaanka Dayuuradda ay ahayd: Kabtankii daadihinayay Dayuuradda oo ay khibraddu ku yarayd.

Wasiirka ayaa intaas ku daraya: In Kabtanka Dayuuraddu uu karti u yeelan kari waayay xakamaynta qaabka hoggaaminta Dayuuradda iyo jiheynteedaba.

Waxaa kale oo uu meesha ka saaray wasiirku, in ay sababtu ahayd: fal argagaxisanimo ama qarxin loo geystay dayuuradda.

Sida la og-yahay: Dayuurad uu la socday Wasiirka Arr.Gudaha ee dalkaas Meksiko iyo Masuuliyiin kale, ayaa 5-tii bishan Novembar ku soo dhacday dhulka oo burburtay, xilli ay dul-mareysay Caasimadda dalkaas.

Waxaa shilkaas ku geeriyooday dhammaan dadkii la socday Dayuuradda oo ay wasiirka iyo Masuuliyiinta kaleba ku jireen.

Tan iyo markaas, waxaa la isla-dhex-marayay jiritaanka fal argagaxisanimo oo ay suuragal tahay in lagu khaarajinayay Wasiirka; taas oo keentay baaritaannada la sameeyay oo natiijadeeda la shaaciyay jimcihii shalay.

Kaalmoy, Kasmo Online..